Ganz früe sind die paar verruckte vo de Füürwehr gange,
im Car vom Ryffel tüends nochli Müed umehange.
Nach em Kaffi und de Gipfeli wird d Stimmig guet,
es redet all vo sooo vil Muet.
Eusi Fahrt gat nach St. Moritz, respektive Celerina,
ab Bivio hät de Car sogar no Kette agha!
Nachem Bezug vom Hotel zur alten Brauerei, sind mir uf Samedan,
go Curling lerne, die Eine mit meh die andere mit weniger Elan.
Nach däre Rutschpartie ischs zrugg is Hotel und zum z Nacht,
aber ab däm Fondue händ mir eus en Schranz in Buch glacht.
Irgendöpis händ die Chöch verdorbe,
mir händ no chöne Chnoblipaste bsorge…
Zum Verdaue isch es dänn id Bar gange,
die Einte sind sehr lang bliibe hange…
Die chaibe Nacht isch sehr, sehr schnäll verbii,
will mir hettet am Morge all wider sölle fit sii.
Schliesslich wänd mir de Iiskanal derab, so genial,
die Einte sind im Gsicht scho (oder immer no) ganz fahl.
Mit 5 G id Kurve und scho bald bisch wider dunne,
leider schinnt bi eus kei Sunne.
All sind hocherfreut und glücklich gsi,
aber die Fahrt isch sehr schnäll verbii.
Bald isch au scho de Car cho
und mir händ s Engadin wider verlo.
Müed und Erschlage isch die Mannschaft hei,
die Einte mit kaputte, die andere mit ganze Bei!
Em Rindi fürs organisiere en grosse Dank,
es isch es guets Gfühl gsi im Rank!
Jetzt hoffed mi er tuets organisiere nomal übernäh,
die meiste würded d’ Amäldig jetzt scho abgä!
 
Andrea Rebsamen